काठमाडौँ । लुम्बिनी प्रदेशका मुख्यमन्त्री चेतनारायण आचार्यले विपद् जोखिम न्यूनीकरण तथा व्यवस्थापनका लागि तीनै तहका सरकार र सम्बन्धित निकायबीच प्रभावकारी समन्वय र पूर्वतयारी आवश्यक रहेको बताएका छन्।
अर्घाखाँचीमा आयोजित विपद् जोखिम न्यूनीकरण तथा व्यवस्थापनसम्बन्धी अन्तरक्रिया कार्यक्रममा बोल्दै उनले विपद्बाट हुने जनधनको क्षति कम गर्न सरकारले आवश्यक लगानी गर्ने र सम्बन्धित निकायले आफ्नो जिम्मेवारी प्रभावकारी रूपमा पूरा गर्नुपर्नेमा जोड दिएका हुन्।
उनले विपद् व्यवस्थापनलाई प्रभावकारी बनाउन कानुनी, संस्थागत तथा व्यावहारिक पक्षमा सुधार गर्नुपर्ने बताए। साथै, पूर्वतयारी, समन्वय र जिम्मेवारीबोधलाई प्राथमिकता दिनुपर्ने उल्लेख गरे।
विपद् व्यवस्थापनका योजना कार्यान्वयन गर्दा स्थानीय तहसँग अनिवार्य समन्वय गर्न निर्देशन दिँदै उनले योजनाको फरफारकअघि जिल्ला समन्वय समिति र स्थानीय तहबाट अनुगमन गर्ने व्यवस्था मिलाइएको जानकारी दिए।
